O campo da Comunicación en América Latina e España rexistra unha actividade de formación e produción intelectual de crecente importancia desde a década de 1970. Con todo, ata agora, os camiños percorridos en cada caso caracterizáronse máis polas distancias que polas converxencias, pese a que tamén foron desenvolvidas diversas experiencias de traballo conxunto ou de certo intercambio en diferentes niveis.
O coñecemento recíproco e a cooperación son aínda reducidos e tanto as potencialidades como os froitos do labor académico efectuado en ambos lados do Atlántico non están sendo aproveitados como poderían chegar a selo para beneficio común.
A Asociación Latinoamericana de Investigadores da Comunicación, ALAIC, considera que hoxe é necesario e posible institucionalizar un espazo académico iberoamericano capaz non soamente de delimitar un ámbito conceptual e xeolingüístico para a especialidade senón, á vez, de definir e instrumentar un marco de política para a interacción creativa entre centros académicos e estudosos da área.
